السلام عليكم ورحمة الله وبركاته 

أهلًا بكم في كلية الطب البشري بجامعة الأميرة نورة بنت عبدالرحمن 💖

نضع بين أيديكم جميع ما يخص السنة الأولى بدءً بـ 

معلومات عامة | General Information

المواد وبلوكات السنة الأولى | Subjects & Blocks

مصادر مفيدة للدراسة | Helpful references

تجارب الطالبات | Personal Experience

نادي طبيبة المستقبل | Future Doctor Club

صور تم إلتقاطها لكليتنا الحبيبة | Pictures

 

(الرجاء الضغط على العنوان للذهاب للصفحة المعنية)

ونرحب بجميع استفساراتكم على القروب المنشأ بالواتس آب، دومًا بخدمتكم

6# تجربة احدى الطالبات Med439

متحمسة أقولكم هالكلام 😍😍😍 .. 

"الطب مُرّ وحُلو .. اصبر على مرارته تتذوق حلاوته❤️" 

أول شيء أنتِ بتعيشين تجربتك لوحدك وكل أحد غير عنك بمعنى لا يهمّك إذا أحد كان يشوف الشيء الفلاني صعب والسنة الفلانية صعبة يعني كلها آراء يمكن مارح تفيدك أنتِ جرّبي بنفسك🖐🏻😌 .. 

هذي النصيحة الأبدية خليها وصيّة 😂 "ذاكري المحاضرات بيومهاااااا قدر الاستطاعة يعني لازم تذاكرين يوميًا" وأحيانًا تكون محاضرة اليوم مربوطة ببكره يعني ضروري تذاكرينها اليوم عشان تفهمين حقت بكره وهكذا ومو شرط الدكتورة تنبهكم هم فاهمين أننا مفروض نسوي كذا ... أمانةً أنا مرات ما ألحق كثير ما أقولك أني المثالية اللي أذاكر باليوم كل محاضرات أمس و و لأن منطقيًا يمكن مايمديني بس أحاول عالأقل الصباح أقرأ المحاضرة اللي أبي .. يعني قدر استطاعتك. لأنّك لو بالاسبوع ماسويتي كذا بتضطرين تذاكرينها بالويكند ..
عشان لما يجي الميد بس يصير تراجعين وتثبتين المذاكرة شعورمرييح أن أغلب المحاضرات مذاكرتها🤍🤍 ويخليك تركزين أكثر بالمعلومات مو تقرين بسرعة عشان الميد. 

مابي أكثّر نصايح وسوالف بس استمتعي بهالكلية 😍😍 ، يعني الحمد لله ربّي اختارك من مجموعة كبيرة عشان تدخلين صحي ثم من مجموعة كبيرة عشان تدخلين طب وثِقي بالله أنه ماحطّك هنا إلا وسبحانه بييسّره لك وأنتِ قدّهاااااا .. معلومات كثير حلوة بتتعلمينها ودكاترة أقسم بالله أني أحمد ربي عليهم ومو وحدة ولا ثنتين الأغلبية كويسااات مع الوقت بتستوعبون اللي أقول❤️❤️ وإذا تحسين ملّيتي من المذاكرة ممكن تذاكرين مع أحد جماعي جربتها كثيير والحمد لله كانت أحسن بكثير من مذاكرتي لوحدي صدقيني فيه بنات يحبون هالشيء بعد فدوّري اللي مثلك 🤍،

خلوكم خوات كلكم وساعدوا بعض بالمعلومات اللي تعرفونها والقنوات اللي تلقونها والمقاطع اللي تفيد بمحاضراتكم والله بتستانسون وتفرحون لما تلقون غيركم يساعدكم .. أنتم قدّها يادكاترة المستقبل والله فخورة فيكم❤️👩🏻‍⚕️👩🏻‍⚕️👩🏻‍⚕️ .. 

الله يوفقكم ويسخّرلكم الأرض ومن عليها والسماء ومن فيها وييسّر أمركم ويفتح عليكم فتوح العارفين.

5# تجربة احدى الطالبات Med439

السلام عليكم 

أول شي ألف ألف مبروك القبوول صبرتوا ونلتوا وما وصلتوا للمكان هذا إلا إن تستحقونه وبجدارة 

ماودي أتكلم عن تجربتي بالتفصيل لأني مؤمنة إن كل أحد يعيش تجربته بشكل مختلف بناءً على أسلوب حياته وشخصيته وقدراته، لكن بذكر لكم أهم النصائح، حتى لو كانت مستهلكة وبتسمعونها من كل مكان ومن كل أحد، يا ليت من هاللحظة تتمعنونها معاي، لكن قبل ما أبدأ، سلاحكم الوحيد قبل كل شي بالكلية هو الدعاء وتحتها مليون خط، أكثر شي بيمشي وضعكم وبيبارك بوقتكم قبل كل شيء هو الدعاء، داييم ادعوا ببركة الوقت والجهد والطاقة، كل يوم قبل ما تبدون أي محاضرة ادعوا دايم بالتسهيلات الإلهية والبركة والخير، ادعوا بصدق نية لأن ربي مستحيل يرد هذي الدعوات، وحتى المعلومات اللي قاعدين تذاكرونها انووها بنية التوسع بالعلم ويكون لله في لله عشان تكونون مأجورين على كل شيء تسوونه.. 

١- يا بنات هالنصيحة بتسمعونها جزافًا، لكن هي الأساس حقيقي، احنا مو داخلين كلية الطب عشان نملي ذاكرتنا معلومات قبل الاختبار ونتخلص منها، احنا بهذي الكلية قاعدين ندرس عشان المعلومات تعيش معانا ونستخدمها بأصح طريقة، لذلك المذاكرة أول بأول، انتوا بكذا مو بس نظمتوا روحكم، بكذا حتى بتكسبون استقرار نفسي لا بأس فيه مقارنة بالوضع النفسي بمجرد تشوفون المحاضرات تراكمت تراكم غير مبرر له، بالبداية بتحسون شلون نذاكر محاضرتين او ثلاث باليوم؟ بالبداية بيكون شي جديد عليكم بس بتكتسبونه مع الوقت وبتصير من أفضل المهارات عندكم..
على سبيل المثال: خلص اليوم وانتوا ماخذين ٣ محاضرات، حاولوا تذاكرون اكبر جزء بفهم واستعياب لأهم الافكار، واللي يبقى منهم عااادي خلوه للويكند.

٢- استغلوا نقاط القوة عندكم، بحيث كون مجموعة اشخاص بصريين؟ استغلوها بشكل قوووي ومن صالحكم بحيث يكون مكسبكم بالنهاية أقوى بمراحل من أساليب الدراسة السائدة والمستهلكة.

٣- العامل النفسي هذا اهم شيء، انا معاكم ممكن تجي فترات بتحسون فقدتوا السيطرة على نفسيتكم، لكن انتوا لو مشيتوا الاوضاع بأفضل ما يكون من طرفكم بكذا راح تقل ضغوطاتكم النفسية، رفهوا عن نفسكم دااايم، خلوا يوم واحد بالاسبوع بريك تسوون كل شيء تحبونه، مثلًا يوم الخميس، وقتها بتكونون جمعتوا طاقة وبترجعون وبقوة، بمعنى عام هذا العامل لا تهملونه وما تعطونه اعتبار، لان حرفيًا كل ما كانت نفسيتكم اقرب للاستقرار كل ما حصدتوا نتائج افضل على المدى القريب والبعيد.

٤- بالبداية يمكن تحسون في عدم استقرار من ناحية أسلوب المذاكرة، بهالحالة حابة اقول طبيييعييي جدًا، البدايات دايم تعتبر محطة تجارب، بعضكم بيعتمد طريقة وحدة وبيرتاح فيها وبيكمل وبعضكم بيجرب كذا طريقة لين يستقر بوحدة، وهذا كللله طبييعي ويحق لكم ولا تبخلون على نفسكم هذي التجارب لان وقتها بترسخون على افضلهم وهذا هو المطلوب.

٥- برمجوا مخكم على فكرة إن راح نتعود نذاكر كل يوم، وقتها حتى العقل يكون مستعد ان يستقبل المعلومات بشكل يومي، بس بدوووون إجهاد فوق الطبيعي، تعاملوا مع هالفكرة بمرونة وبساطة، لان اصلًا بيصير في ايام مكافأة للذات بدون مذاكرة، لكن بشكل عام هذا الفكرة بتكون من صالحكم عشان تتعودون أسرع.

‏٦- Quality over Quantity 

جودة المعلومات اهم بكثيير من ان كم عدد المحاضرات الي بتخلصونها باليوم، صح افضل تحرصون ان ما تراكمون كمية كبيرة، لكن برضو ما راح يفيد لو مليتوا ذاكرتكم معلومات ونسبة فهمكم واستيعابكم مب جيدة، هذي النصيحة مع نصيحة المذاكرة أول بأول لو وازنتوا فيها بذكاء بتكونون كسبانين بشكل يرضيكم إن شاء الله

بالأخير أتمنى إن تعيشون سنة أولى وكل سنين الطب بإنجاز وراحة بال وبشكل راضين عنه، هي بالنهاية ايام من عمركم، استمتعوا على أية حال وبالتوفيق يارب💙.

4# تجربة لمى الزلفاوي Med439

اهلًا 

مبروك قبولكم وتخصصكم في كلية الطب الله يجعلها بداية خير وتوفيق. 

سعيدة أني أشارككم تجربتي وإن كانت ستختلف عنك عزيزتي القارئة ١٨٠ درجة. 

ان شاءالله تكون سنة خفيفة عليكم وبداية أبغض الأشياء التي يمكن أن تحصل للمرء هو الشعور بالضياع وأبسط ما يمكن فعله في ذلك الوقت الاستشارة ولكن ومن تجربة سابقة لا تتأثرين بنصائح وتجربة الدفعات السابقة ولا تأخذيها على أنها مسلّمات وأسس يجب أن تُتبع. 

لا تنسي أن تخلصي النية وتتذكري الغاية والهدف من دخولك لهذا المجال وأن تبذلي أقصى ما بوسعك لكي تتجنبي لحظات الندم (اصلا مافيه وقت تندمين ههه). فأنتِ مسؤولة عن السعي لا النتيجة. 

- جميعنا مختلفون وقدراتنا العقلية تختلف حتى قدرتنا على تحمل الضغوطات والاختبارات تختلف. 

- طريقة مذاكرتك غالبا بتتغير لازم تكون تناسبك أنتِ مو كل طريقة يتبعها الناس بتناسبك أنتِ تعرفين قدراتك وأهم نصيحة ممكن أعطيها لك ‏(quality over quantity). 

- الكم الذي تستطيعين انجازه يختلف تماما عن زميلاتك فلا تتأثرين وتتوترين بكل ما يقال. 

- بعد انتهائك من اي بلوك ينتابك شعور إنك الآن أفهم أدرى وأوعى وتعلمتي وكسبتي تجربة.

- المذاكرة أول بأول تبعدك عن التوتر، الثلاث ليالي التي تسبق الاختبار كنت ولا زلت أرى أنها للمراجعة وليس المذاكرة وهذا السبب بعد الله في ثبات معدلي وتنظيم الوقت والحصول على ساعات نوم كافية كان هو السر.

- الحضور نقطة راح أحرصك عليها مهما كنتِ مضغوطة مهما كنت ما تفهمين من الدكتورة احضري نقصت في ميد سؤال كامل والسبب ما حضرت وذكرت معلومة مهمة وزي ما يقول وودي ألين ‏(80%of success is showing up) 

- ولا يكون حضورك وغيابك واحد اكتبي نوتس مع الدكتورة بعض الاحيان من النوتس تجي الأسئلة.

- تنظيم وقتك يساعدك على توفير وقت لكل شيء وكل شيء يأخذ حقه بالشكل المطلوب النوم المذاكرة والخ.

- وجود جوالك وانتِ تذاكرين اكبر غلط قفليه.

- لا يكون هدفك من هذه السنة الخروج بأقل الأضرار ولا تتأثرين وتعيشين صدمة بعد درجة كل بلوك حاولي تنسينها أو تتناسينها الحاضر أهم من الماضي واعملي للقادم (أنا عند حسن ظن عبدي بي…) توكلي على الله وافعلي بالأسباب.

- مقارنة درجاتك بغيرك تحقر من نفسك وتضعف شخصيتك تجعلك ترين المسألة منافسة ولا يوجد لهذه المنافسة خط فوز لأنها لا تنتهي وتذكري أن القمة تسع الجميع.

- جدًا خطير انك ترفعين سقف آمالك وتطلقين العنان لتوقعاتك لا تتوقعين انك تجيبين درجة معينة لكي تتجنبي لحظات خيبة الأمل خليك واقعية وطموحة بالحد المعقول .

- حسابك لمعدلك كل ١٠ دقائق لن يغير من الواقع شيء على العكس تماما يولد التوتر والقلق ويشغلك عقلك عما هو أهم ولا تنسين ليس هدفك من دراستك حصولك على معدل (وان كان يهم) فالأهم هو الحفاظ على الأرواح التي ستكون بين يديك.

- ‏Study smart not hard. حددي لك مرجع واحد للمذاكرة منه كي لا تتشتتين. 

- سؤالك واستفسارك لا يعني غبائك الكل هنا يتعلم ويحاول أن يفهم هذا هو مفهوم التعلم اسألي وابحثي شاركي الدفعة فيديو استفدتي منه واحتسبي الأجر اشرحي للبنات تثبت المعلومة في مخك ذكري البنات في معلومة ذكرتها الدكتورة البنات ماكانوا منتبهين لها هذا الأشياء تقربك لقلوب البنات ويكفيك فقط دعوات البنات لك .

- الضغط يولد الانفجار لابد ولا ننسى أهمية الجانب الترفيهي بحسب مفهومك وتعريفك له.

- واحدة من الطرق الفعالة اللي اكتشفتها الترم الثاني اني اضغط على نفسي خلال أيام الأسبوع بحيث أتفرغ في الويكند (ليس تفرغ مطلق).

- اخيرًا وليس آخرًا الدعاء والصدقة من أهم ما يمكن أن أذكركم فيه وأحرصكم عليه.

بالنسبة للبلوكات أعتذر لن أكتب تجربتي الشخصية لأسباب عديدة وأهمها أن أعطي أمل مبالغ فيه أو أن أخيب أمل واحدة فيكم واحبطها وكلاهما أمور حصلت لي و وقعت فيها .. ولكن سأعوض و أعرض لكم أهم المصادر والمراجع اللي استفدت منها والدرايف مهم تشيكون عليها بين فترة وفترة بتنرسل لكم وفيها كتب حملوها وفيها تجميعات من سنوات سابقة وفيها summaries وملخصات والخ: 

‏Anatomy:

• ‏Greys Anatomy - book
• ‏Sam webster - youtube
• ‏Essential Anatomy - app
• ‏Anatomy 3d Atlas - app
• ‏Kenhub - youtube
• ‏Netters anatomy flash cards

‏Pathology:

• ‏Step up to medicine - book
• ‏Osmosis - youtube

‏Physiology:

• ‏Ninja nerd - youtube
• ‏Crash course - youtube
• ‏Gyton and hall - book
• ‏Ak lectures - youtube

‏Biochemistry:

• ‏Khan Academy
• ‏Professor Dave explains - youtube

‏Embryology:

• ‏Ninja nerd - youtube
• ‏Armando hasudungan - youtube
• ‏Dr. Najee. Lectures - youtube
• ‏Ak lectures - youtube

‏Pharmacology:

• ‏Abdel mutaal fouda - youtube

اذا احتجتوا أي مساعدة أو استفسار أنا في الخدمة 

لمى الزلفاوي - دفعة 439

3# تجربة الجوهرة العيسى Med439

أهلا وسهلاً بدفعة الطب الجديدة🤩🤩 

انا الجوهرة العيسى طالبة طب سنة ثاني، حبيت اقولكم بعض الاشياء اللي حسيتها مهمة:

- أول شي تذكروا دائما أن ربي حطكم في هالمكان لانكم تستحقونه وتقدرون تنجزون كل شيء فيه🙏🏻

- ثانياً الخوف والتوتر شيء طبيعي وكلنا نمر فيه، لكن لا تخلون هالأشياء تسيطر عليكم، أنتم دائماً أقوى❤️

- ثالثًا دراسة الطب ماهي صعبة وبنفس الوقت ماهي سهلة، كل مرحلة جديدة في حياتكم لها تحدياتها وتأكدوا أنكم قدها🙏🏻

- رابعًا الدراسة أول بأول شي مهم في الطب، بس مو معناته طول يومك تدرسين!! البريك شي اساسي عشان تنجزين بطريقة افضل.

- خامسًا تنظيم الوقت ثم تنظيم الوقت ثم تنظيم الوقت، بالبداية راح يكون صعب، بعدها لما تتعودين بيريحك كثييييير👍🏻

- سادسًا طريقة دراستك اللي تعودتي عليها ممكن تتغير، حاولي تدورين الاخطاء بطريقتك وتصححينها، عشان تشوفين نتائج افضل، جربي اكثر من طريقة وشوفي اللي ترتاحين لها وتنفع معك✅

- سابعًا لا تتأثرين بكلام اللي حوالينك، كل شخص له تجربته الخاصة فلا تخلين تجارب الناس السلبية تأثر عليك🙏🏻

 ثامنًا وأخيرًا عيشوا لحظات الدراسة بكل حب وشغف، كل اللحظات الصعبة راح تمر وتبقى حلاوة الإنجاز❤️

2# تجربة افنان القحطاني Med439

حابه اكتب بعض الامور اللي احسها فادتني وبعضها اغلاط تعلمتها مع مرور الوقت واشياء انصحهم يسوونها هذي الاجازه.

أول شي سنة اولى طب ممكن تكون الأصعب وممكن تكون الأسهل بناء على النفسيه فلازم تهيئين نفسك لها واستعدي بإيجابية ولازم فيه صعاب بس اذا كانت النفسية حلوه بتتخطينها بالنسبة للنصائح العامة: اول شي طريقة المذاكرة تختلف من شخص لشخص وادري بتسمعون هذا الكلام من ناس كثير كمثال في ناس يدرسون كل الوقت بالجامعه ويبقى بالبيت مراجعة وفيه ناس العكس لكن الشي الضروري انه لازم تذاكرين يوم بيومه بطريقة ذكية المفروض مايخلص الاسبوع الا وانتي مخلصه المحاضرات. قراءة الاسئله مهمه مهمه من اي موقع من اي مكان لازم تقرون، بعض الدكاتره يقولون الاسئله باللكتشر مفروض تكونون مركزين، الأوسبي لازم تذاكرونه من قلب لانه يقلب الموازين، لازم تستمتعون بكل يوم وبكل شي تعرفونه جديد وحاولوا تذاكرون للحياة مو للإختبار، مهم المعدل السنة الاولى لكن لا يكون الهاجس لان سنة اولى من الطبيعي انه تكون فيه درجات مو عاجبتك وشيء جديد وحاولوا كل بلوك تتعلمون من الأخطاء السابقة.

- بالنسبة للفاونديشن بلوك ، طبيعي جدًا تحسون انكم تايهين ولا تعرفون كيف تذاكرون والمعلومات ماتدرون كيف تجي لازم المذاكره كل يوم بيومه والمراجعه كثير لهذا البلوك لان المعلومات سهله لكن الكمية غثيثه هو يحاول يأسس فقط من ذاكرتي لازم تركزون في المايكرو والبايوكمستري والباثولوجي لانها مهمه وهي اللي كان لها الحصة الأكبر في الاختبار حاولوا تربطون وتقربونه للواقع. 

- بالنسبة للـ MSK من اسهل البلوكات واحلاها وتحسون انكم بديتوا تفهمون الطب اهم شي الاناتومي بهذا البلوك تراجعونه كثير بتحسون انه مكثف لكن استمتعوا وابتكروا طريقتكم بالحفظ.

- بالنسبة للكارديو من ناحية الكثافة هو اخف يعني بتلاقون وقت اكثر للمذاكره اهم شي الفيزيولوجي افهموه لانهم يجيبون الاسئله من الفهم.

- التنفسي والرينال ما اقدر اعطيكم التجربة حقتي لكن حاولوا تفهمون طريقة كل دكتوره لانهم كل بلوك بيكونون موجودين.

في النهايه حابه اقول لا تيأسون ولا تكون الدرجات هي اللي تحبطكم حاولوا تتعلمون واربطوا لأن الكارديو والتنفسي والرينال فيه معلومات كثيرة متصلة مع بعض بالنسبه لهذا الصيف لا ترهقون نفسكم ولا تفتحون شيء استمتعوا بالإجازه فقط اللي لغتها ضعيفة تحاول تطورها بس واتمنى لكم سنة تكون مليانه نجاح وسعادة

افنان القحطاني - دفعة 439

1# تجربة العنود الحارثي Med439

أهلًا بالدفعة الجديدة

مبروك القبول وعقبال التخرج ونشوفكم أحلى طبيبات يارب❤️❤️

 

كتبنا لكم تجاربنا عشان تأخذون فكرة بس هذا مو معناته إنكم بتصيرون مثلنا وبتمرون بنفس اللي مرينا فيه، كل شخص يختلف عن الثاني من قدرات، طرق مذاكرة، الصعوبات اللي واجهته وإلخ.. يعني الشي اللي أنا أستصعبه ممكن يكون سهل لك والعكس.

 

بدايةً، الإجازه هذي أسترخوا وأستمتعوا فيها قد ماتقدرون مو مطلوب منكم تسوون أي شي من وجهة نظري جمعوا طاقتكم لبداية السنة الأولى.

حابة أركز على الفاونديشن بلوك لأنه أول بلوك وأطولهم مدة (شهرين ونص تقريبًا)  وأكثرهم ساعات (١٠ ساعات) ويفرق مره في المعدل ومهم تدخلون وأنتوا عارفين عنه بعض المعلومات عشان ماتحسون نفسكم ضايعين بما انه شي جديد عليكم.

 

بالنسبه لي كان أصعبهم من ناحية كمية المعلومات (معلومات سهله لكن بكمية كبيرة) غير أننا بدينا ندرس مواد جديده ماتعودنا عليها زي (Pharmacology, Pathology- Microbiology -وغيرهم .. ) بتدرسون الأشياء البيسك لكل مادة واليي باقي البلوكات راح تعتمد على معلوماته فأنصح بشده أنكم تبذلون جهدكم كله بذا البلوك لأنه راح يسهل عليكم كثير باقي البلوكات وبيساعدكم في رفع المعدل.

 

من الأشياء الي أستصعبتها أني أغيّر طريقة مذاكرتي لأني أكتشفت الطريقة الي كنت أستخدمها في التأسيسي ماراح تنفعني في الطب، مهم تذاكرون المحاضرات يوم بيومه وخاصة في البلوكات الدسمة زي بلوك الفاونديشن لأن زي ماقلت المعلومات كثيرة وعشان ماتجين قبل المد أو الفاينال تلقين محاضرات كثيرة متراكمة عليك وتضغطين على نفسك، كانت المذاكره اليومية صعبة علي في البداية لأني ماتعودت عليها وكنت أطول في المحاضرة الوحدة لأنها مواد جديدة فعادي جدًا إذا المذاكرة أخذت منكم وقت أكبر من اللي كانت تاخذه أيام التأسيسي إلى ان تتعودون على المواد وكمية المعلومات.

 

فحطوا ببالكم أنكم بتقعدون تجربون أكثر من طريقة للمذاكرة لين تلقون اللي تناسبكم وذا الشي مر فيه أغلب البنات فلا تتوترون وخذوا وقتكم في إكتشاف الي يناسبكم.

 

 

درجات البلوك راح تتوزع ما بين (مد-فاينال نظري-فاينال عملي).

 

طريقة الإختبار بيكون إلكتروني عن طريق برنامج Examplify وبيعلمونكم عليه أسئلة المد بتكون (اختيارات MCQs) - (ومقالي SAQs) خمس اسئلة مو أكثر والفاينال النظري بيكون كله (اختيارات MCQs).  

 

بالنسبه للفاونديشن بلوك المد كان (35) محاضرة تقريبًا طبعًا تتضمن كل المواد اللي درستوها خلال البلوك بما أننا نظام بلوكات، أما الفاينال -بدون ما نحسب جزئية المد-  (40 وشي) محاضرة، الأرقام مو دقيقة بس حبيت أعطيكم فكرة عن عدد المحاضرات وتتجهزون نفسيًا لها.

 

الفاينال بيكون متضمن جزئية المد بس بنسبة قليلة من الأسئلة، عدد الأسئلة الأكبر راح يكون على الجزئية اللي ما اختبرتوا فيها.

 

باقي البلوكات (MSK -CVS -Renal-Resp)  كانت عدد محاضراتها أقل من الفاونديشن بس معلومات تفصيلية أكثر فتطمنوا مو كل البلوكات راح تكون بنفس كمية وطول الفاونديشن.

 

الـMSK بيكون مع الفاونديشن بأول سمستر وباقي البلوكات الثلاث ( CVS-RESP-RENAL) بتاخذونها السمستر الثاني .

 

حبيت أوضح نقطة

عادي جد يجي وقت الأختبار وأنتوا ماقدرتوا تراجعون أو حتى يمكن ما ختمتوا فلا تخلون هالشيء يوتركم وأدخلوا أختبروا بالمعلومات الي ذاكرتوها وان شاء الله إنها كافية لا تخلون الخوف يضيع منكم المعلومات اللي أنتوا مذاكرينها.

 

مهم أنكم تكونون ماخذين كفايتكم من النوم قبل الإختبار ذا الشيء بيساعدكم كثير في التركيز وممكن تتذكرون أشياء ماذاكرتوها لكن تذكرتوها من شرح الدكتورة أثناء المحاضرة فلا تستهينون بساعات نومكم.

 

 

سؤال دايم يتكر اللي هو: الطب فهم ولا حفظ ؟

الطب يعتمد عليهم الأثنين بالتساوي ، بضرب لكم مثال على بلوك الـ (MSK) في مادة الـAnatomy راح تحفظون أسماء العضلات وموقعها وحركتها والأعصاب اللي تغذيها إلخ.. لكن في مادة الـPhysiology راح تفهمون الـmechanisms الي تشتغل فيها العضلات وغيره.

فالفهم والحفظ في الطب كلهم مهمين ويكملون بعض.

 

 

و في أول سنة نصيحتي لكم إذا كانت درجاتك سيئة لا يحبطك ولا تفكرين أنك الوحيدة وأنك ماتقدرين تكملين لا تخلين أي شيء يأثر على شغفك وحبك للتخصص، حصولك على درجات متدنية مو نهاية العالم خليه يكون لك دافع لتحسين مستواك اكتشفي الأغلاط اللي سويتيها وحاولي تتجنبينها ودوري لك طريقة مذاكرة ثانية اذا الأولى حسيتي إنها مانفعت.

 

 الشعور بالضياع شعور طبيعي في بداية أي شيء جديد على الانسان فما بالك بتخصص زي تخصص الطب البشري، شدي حيلك وإدرسي وسوي اللي عليك وتوكلي على ربك وربي ماراح يضيع لك تعب.

 

لا تضغطين على نفسك بزيادة وتدرسين بشكل متواصل، ضروري تعطين  نفسك راحة يوم كل اسبوع وكل ماحسيتي نفسك محتاجه بريك خذي (ولنفسك عليك حق) لا تهملين إحتياجاتك النفسية والجسدية أبدًا ولا تقسين على نفسك عشان تكونين قادرة تكملين.

 

وأخيرًا أعتذر على الإطالة بس حبيت أوضح لكم أشياء ممكن تواجهكم وممكن لا وإن أي شيئ تمرين فيه وأستصعبتي وضعك تذكري إنك مو لحالك وأنه طبيعي جدًا لأنكم أول سنة وكل شي جديد عليكم من مواد من نظام من دكتورات من اختبارات وغيره، فلا تحملون نفسكم أكبر من طاقتكم.

 

إن شاء الله بتكون سنة سعيدة وبتسمتعون فيها كثير تذكروا التعب اللي تعبتوه عشان توصلون للتخصص اللي تتمنونه أدرسوا بحب مو بس عشان الدرجات عشان حلمكم عشان المرضى الكثير اللي راح تساعدونهم مستقبلًا وبتكونين ملجأهم بعد الله سبحانه وتعالى وأستشعروا عظمة التخصص والمكان اللي أنتوا فيه.

 

(قد يكون السطر الذي حرم عينيك النوم ليلةً شفاءً لداءٍ أرّق العليل ليالٍ أطول)

 

 

أتمنى أني افدتكم ولو بشيء بسيط وإذا احتجتوا إجابة على أي سؤال أنا حاضرة لكم في أي وقت لا تترددون❤️.

 

العنود الحارثي - دفعة 439