G E N E R A L I N F O R M A T I O N
أهلًا بكِ في كلية الطب البشري في جامعة الأميرة نورة بنت عبدالرحمن.. في هذه التدوينة سنتحدث بشكل مبسط عن الاستفهامات التي ربما تتساءلين عنها
◈ موقع الكلية: A2 - المبنى الأيمن.
◈ الزي الطبي | السكرَب: اللون الرسمي المعتمد هو الـ Ceil Blue، لكن لا بأس بدرجات الأزرق مافيه تدقيق على اللون.
◈ المعطف الطبي | اللاب كوت: أبيض وارتدائه يعتبر إلزامي.
◈ الـدوام: على حسب عدد المحاضرات واذا فيه لاب او لا لكن غالبًا يبدأ 8 وينتهي 2.
◈ الجــدول: كل أسبوع جدول جديد مع عناوين المحاضرات اللي بتأخذونها بهذا الأسبوع ، ما عليكم من الجدول الموجود بالبانر هذا جدول غير واقعي، بيتواصلون مع الليدر وهي ترسل لكم الجدول الفعلي.
SDL = Self-Directed Learning + Student activity يعتبرون وقت لك سوي فيه اللي تبين، ومرات يكون فيها نشاطات.
◈ الساعات المكتبية | Office Hours: ساعات تخصصها كل دكتورة بمكتبها تجيب عن اسئلتكم أو تشرح شيء استصعب عليكم، أهم شيء التزموا بالساعات اللي هم محددينها ضروري تحترمون وقتهم الشخصي.
◈ Problem Based Learning classes | PBL جلسات نقاش بين مجموعة طالبات ودكتورة تشرف عليهم، مدتها الثابتة والأساسية بالجدول ثلاث ساعات ولكن تتفاوت المدة على حسب الدكتورة، راح تتوزعون قروبات كل قروب فيه من 9-12 طالبة ولكل case جلستين. الجلسة الأولى قراءة ونقاش وعرض وتبادل الأفكار حول المريض وتحاليله ونتائج فحوصاته وبنهاية الجلسة تستنجون المرض اللي يشكي منه المريض. راح تتوزع الـ Objectives بين القروب الواحد وممكن طالبتين يتشاركون بأوبجكتف معين، تبحثون عنه من محاضراتكم أو الكتب أو اليوتيوب، وتعرضونها قدام الدكتورة وزميلاتكم بالجلسة الثانية للحالة. بداية كل case جديد تختارون الليدر والكاتبة، الليدر توزع القراءة بينكم والكاتبة تكتب الأفكار والاحتمالات اللي تطرحونها أثناء الجلسة على السبورة. تتفاوت عدد الحالات لكل بلوك ولكنها من 2-4 حالات بالمجمل، جلسة النقاش بتكون حول حالة مرضية متعلقة بدراستكم لهذا البلوك مثلاً في بلوك القلب تأخذون مرض متعلق بالأوعية الدموية والقلب وهكذا على بقية البلوكات، راح تعرفون التفاصيل اكثر بوقت الدراسة. الـPBL يدخل بالاختبار العملي تجيكم فقط حالتين من كل بلوك وتكون مشابهه للي تمت مناقشتها.
◈ نظام الإختبارات: كلها راح تكون إلكترونية على برنامج Examplify متوفر على الآيباد واللابتوب فضروري يكون معك أحدهم، ماراح تستخدمون الورق أو الحاسبة اثناء اختباركم البرنامج نفسه يوفرها لكم، الحاسبة راح تحتاجونها بالمسائل في مواد الفيزيولوجي والبايوكيمستري. حابين ننوّه على نقطة لما نقول إلكتروني مايعني إنك بتختبرين من البيت، لا الإختبار راح يكون بالجامعه وفي قاعات موزعة للشعبتين بوجود المراقبات ولو احتجتوا توضيح تقدرون تطلبون الدكتورة. قسم IT راح يكونون معكم طوال فترة الاختبار للي تواجهها مشكلة تقنية فلا تخافون من هالنقطة، الاختبار تدخلونه برقم سري يعطونكم اياه بيوم الإختبار مجرد ماتدخلين الصفحة يمنعك من الخروج منها لنهاية وقت الاختبار أو لحد ما ترفعينه بعد منتصف الوقت.
- الميد | Mid-Block يكون على جزئين منفصلة بمعنى لما تنتقلين للقسم الثاني لازم ترفعينه ومعد تقدرين ترجعين له، قسم للأسئلة الإختيارية MCQs والآخر الجزء المقالي SAQs.
- الأختبار العملي | OSPE Exam إختبار إلكتروني في معمل عبارة عن محطات يختلف عددها من بلوك لبلوك لكن غالبًا تكون 25 محطة، كل محطة لها دقائق محددة بعدها يرن الجرس وتتحركين للمحطة اللي بعدها، لما تدخلون كل وحدة بتجلس بمحطة عليها رقم وأسئلة وتتبع أسهمهم لحد ماتمر على كل المحطات وترجع نفس مكانها، يتخللها محطات راحة (resting station) مافيها أسئلة تراجعين حلولك وتكملين اللي ينقصك، كل محطة سؤال واحد ولكن بفقرات متعددة تتفاوت عدد الفقرات لكن اقصى شيء خمسة، عند المرور بجميع المحطات والإنتهاء المشرفات بيطلبون ترفعون اختباركم وتنتقلون للقسم الثاني وهو قسم الـ (PBL) عبارة عن حالتين مرضية من اللي بتاخذونها في الـ PBL classes أثناء البلوك وكل حالة عليها خمسة أسئلة وكل سؤال بدرجة بمجموع 10 درجات، الأسئلة تكون مقالية.
- الأختبار النظري | Final Theory Test قسم (MCQs) فقط.
((لكل بلوك له ميد واحد و 2 فاينلز نظري وعملي ، لا يوجد كويزات.. كل البلوكات راح تستخدمون هذا البرنامج في الإختبارات العملية والنظرية، عدا السلم والعرب ورقي بالجامعه تختبرون الميد والفاينل))
"أنت لا تدرس للامتحان، بل تدرس لليوم الذي تكون أنت فيه الفاصل بين المريض وقبره"
◈ مركز المحاكاة وتنمية المهارات | Simulation and Skills Development Center: تقنية المحاكاة هي أسلوب تعليمي طبي حديث، يستخدم تقنيات للمحاكاة الطبية والواقع الافتراضي، للحد من الأخطاء الطبية. مركز المحاكاة وتنمية المهارات بجامعة الأميرة نورة بنت عبد الرحمن يعد من أكبر مراكز المحاكاة في العالم، يوفر بيئة آمنة للتعليم والتدريب الطبي، يتم استخدام المعامل السريرية لمحاكاة أماكن العمل في المستشفى، وتدريب الطالبات على دمى عالية التقنية لمحاكاة المرضى الحقيقيين. كما أن المركز يقدم دورات دعم الحياة المصرحة من جمعية القلب الأمريكية.
خلال فترة الدراسة بعض المحاضرات بتكون في مركز
المحاكاة، راح تتعلمون أشياء مفيدة في المركز مثل الخياطة الجراحية، وأنواع الأصوات التي يمكن سماعها بواسطة السماعة الطبية، والحقن العضلي وغيرها، هذه المحاضرات تكون من ضمن
الاختبارات العملية فقط.
- موقع المركز: A10
THESE PICTURES WERE TAKEN FROM THEIR TWITTER ACCOUNT
